He rangai maomao ka taka ki tua o Nukutaurua, e kore a muri e hokia

Hiki nuku, hiki rangi ki te taumata o Maunga Taniwha e tū tonu
E rere rā Ōtānenui te wai tukukōrero, wai tukuwairua
ki te moana o Tokerau e hora nei
Ko Ngāti Kahu he pou whenua he pou tangata,
ngā whakahekenga o Te Parata rāo ko Kahutianui
Tau atu tau atu tau atu e

Ka noho mai Te Rito Te Kura Taiao ki ngā rekereke o ngā Pā Kāinga nei o Taumarumaru, Ōtānenui, Ōhumuhumu o Koekoeā hoki.
He kaupapa ao Māori, reo Māori tēnei mō ngā mokopuna Tau 1 ki te Tau 8.
E tika ana kia ako, kia whāngai tātou i ngā āhuatanga o te kāinga nei o Ngāti Kahu me ngā iwi o Muriwhenua hei marautanga ako, hei puna mātauranga.

He whare reo Māori tēnei. Ko ngā akoranga i roto i te reo Māori. Tū atu i te reo me ōna tikanga, ko te kaupapa matua kia hono atu ngā mokopuna nei ki te taiao.
Ko au te taiao, ko te taiao ko au.
Ko tātou tērā!

Kia taiaonuku, ka taiaorangi
Toitū te mana ūkaipō